លោក វេជ្ជបណ្ឌិត លី សូវ៉ាន់ អនុប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានថ្លែង ប្រាប់អោយដឹងនៅថ្ងៃសៅរ៍នេះថា ក្រសួងសុខាភិបាល នឹងប្រកាសក្នុងពេលឆាប់ៗខាងមុខ នេះ លទ្ធផល នៃការអង្កេតរកអត្តសញ្ញាណ ជំងឺអាថ៌កំបាំង ដែលបានសម្លាប់កុមារ ចំនួន៦០នាក់។ មន្ត្រីសុខាភិបាលរូបនេះ បានបញ្ជាក់ថា ក្រុមវេជ្ជបណ្ឌិតដែលកំពុងស្រាវជ្រាវ ស្វែងរកអត្តសញ្ញាណ ជំងឺ អាថ៌កំបាំងនេះបានរកឃើញតម្រុយ ជំងឺនេះហើយ ប៉ុន្តែលោកបដិសេធមិនធ្វើ អត្ថាធិប្បាយលម្អិតទេ។
ព្រមពេលជាមួយគ្នា លោក លី សូវ៉ាន់ បានអំពាវនាវអោយអាណាព្យាបាលយកកុមារទៅមន្ទីរពេទ្យជាបន្ទាន់នៅពេលដែល កុមារមានសញ្ញាពិបាករកដង្ហើម។ លោកបានបញ្ជាក់ថា៖«សូមកុំប្រើប្រាស់ ថ្នាំខុសវេជ្ជបញ្ជា»។
យោងតាមសេចក្តីប្រកាសព័ត៌មានរបស់អង្គការសុខភាពពិភពលោក WHO ដែលចេញផ្សាយនៅថ្ងៃទី៦កក្កដា ក្រុមគ្រូពេទ្យបានរកឃើញករណីជំងឺអាថ៌កំបាំងនៅលើកុមាររហូតដល់៧៤នាក់ បើគិតចាប់ពីខែមេសារហូតដល់ថ្ងៃ៥កក្កដា។ ប៉ុន្តែក្នុងចំណោមករណីទាំងនោះ ៦១ករណីបានស្លាប់ក្រោយពីត្រូវនាំមកដល់មន្ទីរពេទ្យ (គន្ធបុប្ជាសៀមរាប និងភ្នំពេញ)។ ស្ថាបនិកមន្ទីរពេទ្យគន្ធបុប្ជា លោក Beat Richner បានថ្លែងប្រាប់ទូរទស្សន៍CNNកាលពីពេលថ្មីនេះថា៖«កុមារទាំងនោះ ភាគច្រើនត្រូវបាននាំមកដល់មន្ទីរពេទ្យយើងនៅនាទីចុងក្រោយ។ ពួកគេស្លាប់ ដោយសារតែសួតរបស់ពួកគេត្រូវបានបំផ្លាញ»។
សេចក្តីប្រកាសព័ត៌មាននេះបានសរសេរថា ក្រុមការងារចម្រុះដែលដឹកនាំដោយក្រសួង សុខាភិបាល កំពុងស្វែងរកមូលហេតុ នៃជំងឺនេះយ៉ាងម៉ត់ចត់ ហើយថាឪពុកម្តាយ ត្រូវប្រុងប្រយ័ត្នចំពោះសុខភាព របស់កូនៗរបស់ ពួកគេ។
យោងតាមសេចក្តីប្រកាស ព័ត៌មានរបស់ WHO ភាគច្រើននៃកុមារ ដែលមានជំងឺទាំងនោះ ពួកគេមានអាការៈដូចគ្នាដូចជា ក្តៅខ្លួន មានបញ្ហាផ្លូវដង្ហើម និងប្រព័ន្ធសសៃប្រសាទ ដែលអាការៈទាំងនេះ គឺជាគោលដៅនៃការវិភាគ រោគវិនិច្ឆ័យរបស់ក្រុមគ្រូពេទ្យ។ បើតាមលោកវេជ្ជបណ្ឌិត Beat Richner ខួរក្បាលរបស់កុមារទាំងនោះ មានសញ្ញារលាក។ ភាគច្រើននៃកុមារ ដែលមានជំងឺនេះ មានអាយុក្រោម៣ឆ្នាំ។
ប្រភព៖ ថ្មីៗ
.jpg){kind=tracking}
