មានលិខិត២ច្បាប់ ដែលលោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេសកម្ពុជាបានធ្វើនៅថ្ងៃពុធទី៤កក្កដានេះទាក់ទង នឹងសកម្មភាព រាយបន្លាលួសរបស់ យោធាថៃ ដែលកម្ពុជាហៅថា ជាសកម្មភាពរំលោភ សាលក្រមឡាអេនៅក្នុង តំបន់ ដែលត្រូវគ្មានកងទ័ព បណ្តោះអាសន្ន ក្បែរប្រាសាទព្រះវិហារ។
ទីមួយគឺជាកំណត់ទូតដែលលោករដ្ឋមន្ត្រីការបរទេសសរសេរផ្ញើរទៅ រដ្ឋាភិបាលទីក្រុងបាងកក ដោយមានរៀបរាប់រាប់អំពីសកម្មភាពរំលោភបំពានរបស់យោធាឈុតខ្មៅថៃ ហើយនិងបានស្នើអោយចាប់វិធានការ បញ្ឈប់សកម្មភាពនេះទៀត។ ទី២គឺជាលិខិតជូនដំណឹង ដែលប្រមុខការទូតកម្ពុជា សរសេរប្រាប់ទៅលោក ហ្វ៊ីលីព គូវ្រឺ (Philippe COUVREUR) ជាក្រឡាបញ្ជីនៃតុលាការយុត្តិធម៌អន្តរជាតិទីក្រុងឡាអេដែលរៀបរាប់ អំពីសកម្មភាពយោធាថៃ។
នៅក្នុងលិខិតផ្ញើរទៅក្រឡាបញ្ជីតុលាការឡាអេ លោកហោ ណាំហុងបានសរសេរយ៉ាងដូច្នេះថា៖«កម្ពុជាសូមតវ៉ា ប្រឆាំងសកម្មភាពរបស់ ប្រទេសថៃនៅក្នុងតំបន់ដែលត្រូវគ្មានកងទ័ពបណ្តោះអាសន្ន ដែលសកម្មភាពទាំងនោះ គឺជាការរំលោភទៅនឹងដីកា បង្គាប់របស់តុលាការឡាអេ ចុះថ្ងៃទី១៨ កក្កដា ឆ្នាំ២០១១»។ លោកហោ ណាំហុងបានបន្តសរសេរប្រាប់ លោកក្រឡាបញ្ជីដដែលថា៖«កម្ពុជាបានស្នើអោយ ថៃបញ្ឈប់សកម្មភាពទាំងនេះ ដែលអាចបង្កអោយ មានបរិយាការតានតឹងនៅក្នុង តំបន់ដែលត្រូវគ្មានកងទ័ព បណ្តោះអាសន្ន ហើយនិងសូមអោយថៃគោរព ដីកាបង្គាប់របស់ តុលាការឡាអេ»។
រដ្ឋមន្ត្រីការបរទេសកម្ពុជាបានស្នើអោយក្រឡាបញ្ជីនាំយកព័ត៌មានអំពី ការរំលោភបំពានរបស់ទាហានថៃទាំងនេះទៅប្រាប់ក្រុមប្រឹក្សាចៅក្រមនៃ តុលាការយុត្តិធម៌អន្តរជាតិ។
ចំណែកឯកំណត់ទូត ដែលកម្ពុជាផ្ញើទៅ រដ្ឋាភិបាលទីក្រុង បាងកកវិញ ក្រសួងការបរទេសបានរៀបរាប់លំអិតអំពី សកម្មភាពរបស់យោធា ឈុតខ្មៅថៃដែល ព្យាយាមដាក់រាយបន្លាលួសជាច្រើន ដងតាំងពីថ្ងៃទី២៣មិថុនាមក ហើយបានស្នើអោយរដ្ឋាភិបាលថៃចាត់វិធាន មិនអោយមានសកម្មភាពបែប នេះកើតឡើងបន្តទៀត។ រដ្ឋាភិបាលកម្ពុជា បានសរសេរប្រាប់ រដ្ឋាភិបាលថៃថា ការបញ្ឈប់សកម្មភាព បែបនេះ គឺដើម្បីបញ្ចៀសកុំអោយ មានភាពតានតឹង ដែលនឹង ផ្តល់ផលប៉ះពាល់ ជាអវិជ្ជមានបរិយាការនៃអនុវត្តដី កាបង្គាប់របស់ តុលាការយុត្តិធម៌អន្តរជាតិ៕
ប្រភព៖ ថ្មីៗ
