កាលពីរសៀលថ្ងៃទី០២ ខែកក្កដា ឆ្នាំ២០១២ មិត្តភ័ក្តិស្និទ្ធស្នាល ម្នាក់របស់ កញ្ញា សុខ ពិសី បានចេញមុខ អះអាងថា សុខ ពិសី មិនបានសម្ងំ លាក់ខ្លួនអ្វីនោះទេ។ កាលពី សប្តាហ៍មុនមាន ព័ត៌មានចុះផ្សាយថា គេបានឃើញកញ្ញា សុខ ពិសី ជិះរថយន្ត Range Rover ពណ៌សដ៏ទំនើប នៅត្រង់ចំណុច ស្តុបបូកគោ បើកលំហែកាយ យ៉ាងរីករាយនៅ កណ្តាលរាជធានី ភ្នំពេញ រីឯក្រុមគ្រួសារ និងមិត្តភ័ក្តិរបស់នាង នៅតែអះអាងថា សុខ ពិសី មិនបានសម្ងំលាក់ខ្លួន ឬគេចវេសពីរឿងអ្វីនោះទេ។
ជួបសម្ភាសជាមួយ “ថ្មី” កាលពីរសៀលថ្ងៃទី០២ ខែកក្កដា ឆ្នាំ២០១២ មិត្តភ័ក្តិស្និទ្ធស្នាលរបស់កញ្ញា សុខ ពិសី ដែលសុំមិន បង្ហាញអត្តសញ្ញាណនោះ បានបង្ហើបប្រាប់ឲ្យ ដឹងជុំវិញព័ត៌មានចុងក្រោយ ដែលគេបានឃើញ កញ្ញា សុខ ពិសី ជិះឡាន Range Rover ពណ៌ស នៅត្រង់ចំណុចស្តុបបូកគោថា “វាគឺជាការពិត គឺនាងទើប នឹងត្រឡប់មកពី សិង្ហបុរី។ នៅពេលដែលសួរថា តើហេតុអ្វីក៏ សុខ ពិសី មិនបង្ហាញវត្តមាន ជាសាធារណៈ ឬក៏ឡើងច្រៀង ក្នុងការប្រគំតន្ត្រី របស់ទូរទស្សន៍ណាមួយទៅ ដើម្បីសបញ្ជាក់ថា នាងមិនបានសម្ងំ លាក់ខ្លួន?
ប្រភពពីមិត្តភ័ក្តិ បានតបថា “ពិសី មិនមានពេលវេលា សម្រាប់ឡើងច្រៀង នៅតាមបណ្តាស្ថានីយទូរទស្សន៍ ណាមួយទេ ព្រោះនាងត្រូវវិល ទៅសិង្ហបុរីវិញ។ ឆ្លើយតបតែប៉ុណ្ណេះ ក៏ប្រាប់ថា ជាប់រវល់ រួចក៏បិទទូរស័ព្ទ។ទោះជាបែបណា មហាជនជាច្រើន នៅតែមានមន្ទិលថា មិត្តស្និទ្ធស្នាលរបស់ សុខ ពិសី ដែលបាន លើកឡើងមកនេះ ក៏នៅមានចំណុច លាក់បាំងដូចគ្នា ដែលមិនអាចឲ្យគេជឿថា សុខ ពិសី ចេញទៅរៀន ជំនាញអ្វី នៅប្រទេសសិង្ហបុរី នោះទេ។ ការបាត់ខ្លួន សុខ ពិសី ពីឆាកតន្ត្រី ត្រូវបានគេមើល ឃើញថា មានរយៈពេល ជិតពីរខែមកហើយ ដែលបញ្ហានេះ បានធ្វើឲ្យមជ្ឈដ្ឋានអ្នកគាំទ្រ មានការភ្ញាក់ផ្អើល យ៉ាងខ្លាំង ខណៈ ដែលសុខៗតារា ក្នុងក្នុងបេះដូង រូបនេះបាត់ខ្លួនដោយ មិនបាន ផ្តល់ព័ត៌មានអ្វី សូម្បីបន្តិចនោះ។
គួររំលឹកថា សុខ ពិសី ស្រាប់តែដកខ្លួន ពីវិថីចម្រៀង ចាប់តាំងពីចុង ខែមេសា មក។ នាងបានដាក់ពាក្យសុំច្បាប់ផ្អាក ច្រៀងនៅ ផលិតកម្មសាន់ដេ ចំនួន៣ខែ កាលពីខែឧសភា ដោយភ្ជាប់មក ជាមួយនូវ មូលហេតុថា នាងចេញទៅច្រៀង នៅឯបរទេស ដោយមិនបញ្ជាក់ថា ប្រទេសណានោះទេ។ បើទោះជាដូច្នេះក្តី កាលនោះ គេយល់ថា នាងទៅសហរដ្ឋ អាមេរិក ព្រោះមុនពេលបាត់មុខ ពិសី បានប្រកាសប្រាប់ថា នាងបានឆ្លងកាត់ បទសម្ភាសន៍នៅ ស្ថានទូតអាមេរិក រួចរាល់ និងសង្ឃឹមជាប់១០០%។
ក៏ប៉ុន្តែ ការពិត នាងមិនបានទៅ អាមេរិកនោះឡើយ។ នៅដើមខែមិថុនា អ្នកគ្រប់គ្រងទូទៅនៅផលិតកម្មសាន់ដេ បានប្រាប់ថា សុខ ពិសី ទៅរៀនជំនាញរក្សា សម្រស់ នៅប្រទេសសិង្ហបុរី ចំនួន៣ខែ។ ប៉ុន្តែ រហូតមកដល់ពេលនេះ ការពិតយ៉ាងណានោះ គេនៅមិនទាន់បាន ដឹងប្រាកដនៅឡើយទេ៕
ប្រភព៖ ថ្មីៗ
