ភ្នំពេញ៖ ពិធី ការិនីញញឹមស្រទន់ ថ្ពាល់ខួច កញ្ញា តេង លក្ខិណា ជាពិធីការិនីនៅក្នុងកម្មវិធី A1 Concert របស់ស្ថានីយ ទូរទស្សន៍ CTN បានបង្ហាញចំណាប់អារម្មណ៍ថា “ភាពស្រស់ស្អាត ជាមន្តស្នេហ៍ដ៏ទាក់ទាញ” លើសពីនេះ នាងបានបង្ហាញពី អាថ៌កំបាំង ដែលនាំឲ្យខ្លួននាង ទទួលបាន ការចាប់អារម្មណ៍ពីមហាជន ដោយការយកចិត្ត ទុកដាក់ថែរក្សា សម្រស់ស្បែកមុខ និងស្បែកដងខ្លួនរបស់នាង។
សម្រស់ជាកត្តាដ៏សំខាន់ៈ ទាក់ទិននឹងបញ្ហា សម្រស់នេះ កញ្ញា តេង លក្ខិណា បានឲ្យតម្លៃយ៉ាងជ្រាលជ្រៅ ចំពោះសម្រស់ស្បែកដងខ្លួន និងស្បែកមុខ។ លក្ខិណា បានលើកឡើងថា សុភាពនារីទូទៅតែងតែ ចាត់ទុកសម្រស់ ជារឿងសំខាន់ របស់ពួកគាត់។ លក្ខិណា បញ្ជាក់ថា បើយើងមានសម្រស់ស្អាត មិនថាអ្នកសិល្បៈ ឬអ្នកក្រៅសិល្បៈនោះទេ ទៅណាមកណា គេតែងតែចាប់អារម្មណ៍ ចំពោះយើង។
ដើម្បីមានសម្រស់ស្រស់ស្អាត៖ នៅពេល ដែលធម្មជាតិ បានផ្តល់ឲ្យយើង នូវរូបកាយ មួយនេះហើយ ទោះជាបែបណា ក៏យើងត្រូវតែយកចិត្ត ទុកដាក់ថែរក្សា ឲ្យបានល្អដែរ។ កញ្ញា តេង លក្ខិណា បានប្រាប់ឲ្យដឹងថា យើងត្រូវយកចិត្តទុកដាក់ ថែរក្សាសម្ផស្ស ជារៀងរាល់ថ្ងៃ ជាពិសេស ត្រូវឧស្សាហ៍ហាត់ប្រាណ។ លក្ខិណា ថា មួយសប្តាហ៍ យ៉ាងហោចណាស់ ក៏នាងឆ្លៀតពេលទៅ ហាត់ប្រាណបាន៣ថ្ងៃដែរ។ លើសពីនេះ ដើម្បីរក្សាស្បែករ បស់យើងឲ្យមាន សំណើម យើងត្រូវញ៉ាំទឹកឲ្យបានច្រើន។ ពេលចេញទៅ ខាងក្រៅ ដូចជាថតខារ៉ាអូខេ ថតស្ពតពាណិជ្ជកម្មផ្សេងៗ ខ្ញុំតែងតែលាបឡេការពារស្បែក ពីការរងនូវកម្ដៅថ្ងៃ។ រីឯការចាំបាច់មួយទៀត គឺត្រូវតែគេង ឲ្យបានគ្រប់គ្រាន់ នោះទើប មិនធ្វើឲ្យមុខ របស់យើងស្លក់ និងស្បែកស្រអាប់ខ្មៅ។
គ្រឿងអលង្ការៈ ការតុបតែងខ្លួន គ្រឿងអលង្ការ ក៏ជួយលើកសម្រស់ របស់យើង បានមួយកម្រិតទៀតផងដែរ។ លក្ខិណា បានប្រាប់ឲ្យដឹងថា នាងមិនសូវនិយម ប្រកាន់ម៉ាករបស់ គ្រឿងអលង្ការពេកនោះទេ ភាគច្រើន នាងប្រើគ្រប់ម៉ាក ទាំងអស់ មិនថាកាបូប ស្បែកជើង ឬខ្សែកនោះទេ។ នាងប្រើកាបូប Chanel ស្បែកជើងម៉ាក Dior និងខ្សែកម៉ាក Chanel និង LV ។
ជោគជ័យសម្រាប់ខ្លួនលើសម្រស់ៈ ជាពិធីការិនី ដ៏ស្រស់សោភា និងល្បីល្បាញម្នាក់ ក្រៅតែពីមាន វោរហាស័ព្ទ ដែលជា ចំណុច សំខាន់នោះ ក៏ត្រូវមាន ចំណុច ដទៃទៀតរួមផ្សំ ផងដែរ។ លក្ខិណា បានិយាយថា ចំពោះនាង ក៏មិនអាច និយាយដោយ ប្រាកដប្រជា បានដែរថា ចំណុច ដែលនាំឲ្យ នាងមានគេចាប់ អារម្មណ៍ និងទទួលបានភាពជោគជ័យ ក្នុងអាជីពសិល្បៈនោះ ថាជាអ្វី? ប៉ុន្តែមិត្តភ័ក្តិ នៅក្បែរនាង ភាគច្រើន គេនិយាយថា នាងមានចំណុច ពិសេស ដែលទទួល បានការ ចាប់អារម្មណ៍ ពីមហាជននោះ គឺសម្រស់ ស្បែកមុខ និងស្បែកដងខ្លួន របស់នាង បូករួមទាំង ស្នាមញញឹម ថ្ពាល់ខួច ប្រកបដោយ មន្តស្នេហ៍ ផងនោះ ក៏បានស្ទួយឲ្យ សម្រស់របស់នាង កាន់តែមានភាពទាក់ទាញ ទ្វេឡើង៕
ប្រភព៖ ថ្មីៗ
