គេនៅចាំថា ម្ចាស់បទ “ដីថ្លៃប្រល័យស្នេហ៍” ដែលបកស្រាយដោយតារាចម្រៀងសម្បុរស្រអែម គឺលោក ម៉ារ៉ា ប៊ុនណ្ណា នាអំឡុងឆ្នាំ២០០៧បានធ្វើឲ្យកេរ្តិ៍ឈ្មោះតារារូបនេះស្ទុះឡើង មួយកម្រិតយ៉ាងឆាប់រហ័ស។ ប៉ុន្តែក្រោយមក ក៏បាត់មុខ ម៉ារ៉ា ប៊ុនណា ពីវិស័យសិល្បៈចម្រៀងមួយរយៈ ដោយគ្មានអ្នកណាម្នាក់ដឹងពីមូលហេតុឡើយ។ ជួបសម្ភាសជាមួយ “ថ្មីៗ” លោកបានឲ្យដឹងថា បន្ទាប់ពីផលិតកម្ម ព្រះអាទិត្យ ផ្អាកការផលិតនាឆ្នាំ២០០៨ លោកក៏ផ្អាកច្រៀងមួយរយៈ។
ចាប់តាំងពីពេលនោះមក គេក៏មិនបានឃើញវត្តមាន ឬបានស្តាប់សំនៀងរបស់លោកទៀតទេ ខណៈដែលតារាចម្រៀងរូបនេះ ក៏ធ្លាប់បានសាងកេរ្តិ៍ឈ្មោះ និងភាពល្បីល្បាញមកដែរ តាមរយៈបទ “ដីថ្លៃប្រល័យស្នេហ៍”, ”ក្របី១០០”, “កំលោះភួយសាច់” ក្នុងអំឡុងឆ្នាំ២០០៧ ដែលទទួលបានការគាំទ្រយ៉ាងខ្លាំង ពីគ្រប់មជ្ឈដ្ឋានទូទៅ ជាពិសេសពីសំណាកើយុវវ័យ ហើយគេក៏ស្គាល់ឈ្មោះលោក ចាប់តាំងពីពេលនោះមក។ សរុបទៅ ម៉ារ៉ា ប៊ុណ្ណា ច្រៀងចំរៀងបាន២០បទ និងច្រៀងឲ្យស្ពតស្រាសាច់ដុំ, ស្រាបារ៉ាហ្សូ, ច្រៀងចម្រៀងអប់រំផ្តាសាយបក្សី...ជាដើម ។
ម៉ារ៉ា ប៊ុណ្ណា បានឲ្យដឹងថា នៅរយៈពេលដ៏ខ្លីខាងមុខនេះ លោកនឹងចេញបទថ្មីចំនួន២បទទៀតនៅក្នុងអាល់ប៊ុម វ៉ុលទី២០១ របស់ផលិតកម្ម KH ។ បទទាំងពីរបទនោះ មានចំណងជើងថា “ដីថោកចុកឈាម”, “ចង់ធ្វើល្អសងពេលខុស។ មជ្ឈដ្ឋានទូទៅនៅចាំអ៊ុត មើលថា តើតារារូបនេះ អាចសាងប្រជាប្រិយភាពវិញ បានដូចកាលពីប៉ុន្មានឆ្នាំ មុនដែរទេ ខណៈដែលទាំងពីរបទ របស់លោកនៅផលិតកម្ម KH មានចំណងជើងគូរ ឲ្យទាក់ទាញ គ្រាន់បើ ប៉ុន្តែ តើទឹកដមសំឡេងវិញនោះ អាចមានការ ប្រែប្រួលខុសពីមុនដែរ ឬយ៉ាងណា?
គួររំលឹកថា ម៉ារ៉ា ប៊ុណ្ណា ចូលសិល្បៈដំបូង ក្នុងឆ្នាំ២០០៥ លោកបានចូលទៅធ្វើ តេស្តសំឡេងនៅផលិតកម្មព្រះអាទិត្យ ដោយលើកយកបទ ”ម្អមស្រែ” របស់លោក ព្រាប សុវត្ថិ មកច្រៀង ហើយក៏ត្រូវបានម្ចាស់ផលិតកម្ម ទទួលយកលោកឲ្យ ចូលច្រៀងប្រចាំ ផលិតកម្ម តែម្តង។ ម៉ារ៉ា ប៊ុណ្ណា មានស្រុកកំណើត នៅជាយក្រុងភ្នំពេញ (ម្តុំពោធិ៍ចិនតុង) មានបងប្អូន៧នាក់ ស្រី២នាក់ លោកជាកូនទី៤ក្នុងគ្រួសារ។ ក្នុងចំណោមបងប្អូន ទាំង៧នាក់ មានប្អូនប្រុសទី៥ ក៏មាននិស្ស័យសិល្បៈដូចលោកដែរ ប៉ុន្តែ នៅមិនទាន់មានឱកាស នៅឡើយទេ៕
ប្រភព៖ ថ្មីៗ
