មួយរយៈកន្លងមកនេះ គេមិនសូវឃើញ បទថ្មីៗ របស់តារាចម្រៀង មនោសញ្ចេតនា លោក រិន សាវ៉េត ចេញលក់នៅលើ ទីផ្សារនោះទេ ដែលនាំឲ្យលេចឮ ពាក្យចចាមអារ៉ាមថា លោក រិន សាវ៉េត អាចនឹងដើរចេញ ពីរស្មីហង្សមាស ដូចអតីតតារា រួមក្រុម គឺលោក សុខ រក្សា ព្រោះតែ រិន សាវ៉េត មិនមានបទថ្មី ចេញសោះ ហាក់ស្ងាត់ ដូចចោរលួចសេះ អ៊ីចឹង។ ភាពស្ងប់ ស្ងាត់នេះបណ្តាល ឲ្យគេសង្ស័យថា តារាចម្រៀង មនោសញ្ចេតនារូបនេះ អាចដើរចេញពី ផលិតកម្មរស្មីហង្សមាស ទៅរកទ្រនំថ្មី។
ទាក់ទិននឹងការលើកឡើង ខាងលើនេះ លោក រិន សាវ៉េត ចេញមុខអះអាងថា លោកមិនបានចេញទៅណា ចោលទ្រនំហង្សមាសឡើយ បើទោះបីជា លោកមិនសូវមានបទថ្មី ចេញក៏ដោយ។ លោក រិន សាវ៉េត អះអាងយ៉ាងមុតមាំថា “អ្នកណាថា? គ្មានរឿងបែបនេះទេ ខ្ញុំនៅតែច្រៀងឱ្យហង្សមាសដដែល។ ខ្ញុំសូមបញ្ជាក់ថា ខ្ញុំមិនត្រឹមតែមិនចាកចេញពីហង្សមាសនោះទេ ខ្ញុំថែមទាំងបានបន្តចុះកុងត្រាច្រៀងឱ្យ ហង្សមាស ៥ឆ្នាំបន្ថែមទៀតផង។ បើគិតទៅ ខ្ញុំច្រៀងឲ្យហង្សមាស ជិត៨ឆ្នាំមកហើយ ពោលគឺ តាំងពីឆ្នាំ២០០៤ មកម្ល៉េះ ”។
ប្រភព៖ ថ្មីៗ
