បច្ចុប្បន្ន គេសង្កេតឃើញថា
យុវវ័យមួយចំនួន មានសង្សារ តែម្នាក់ប៉ុណ្ណោះ
ប៉ុន្តែអ្នកខ្លះទៀត មិនមែនមាន សង្សារតែម្នាក់ នោះទេ
ដែលអ្នកខ្លះ លើកឡើងថា ការមានច្រើនបែបនេះ ដើម្បីទុក សឺគួរ។
តើពិតជាអីចឹងមែនឬ?
ឆ្លើយតបទៅនឹង បញ្ហាខាងលើ យុវជន ហ៊ឹម ចិត្រា និស្សិតឆ្នាំទី ០២ នៃសាកលវិទ្យាល័យបៀលប្រាយបានឲ្យដឹងថា ការមានសង្សារច្រើន ទុកសឺគួរបែបនេះ ដោយសារតែយុវវ័យឥឡូវមានឱកាសនៅជួបជុំគ្នាច្រើន ជាពិសេសគឺមានមនុស្សស្រីស្អាតៗច្រើន ងាយស្រួលជ្រើសរើសគ្នាទៅវិញទៅមក។ យុវជន ម្នាក់នេះបន្តថា ទោះបីជាមានសង្សារក៏ដោយ បើមើលទៅឃើញមានអ្នកផ្សេងស្អាតជាង គឺអាចទៅរកអ្នកផ្សេងទៀត។ យុវជន ចិត្រា បានសង្កត់ធ្ងន់ថា ”ការជ្រើសរើសដៃគូច្រើនបែបនេះ គឺបណ្ដាលមកពី ភាពមិនទុកចិត្តគ្នាទៅវិញទៅមក ទើបមានការយកសង្សារសឺគួរឲ្យច្រើន ជៀសវាងគេក្បត់យើងឈឺចាប់ បានមួយទៀតមកជំនួសភ្លាម”។
“ភាពភ្លើតភ្លើន តែ១មុខ និងការចង់សាកចង់ដឹង នាំឲ្យមានច្រើនអញ្ចឹង”។ នេះជាការលើកឡើងរបស់ យុវជន ងន់ លឹមហាក់ និស្សិតសាកលវិទ្យាល័យភូមិន្ទភ្នំពេញ។ យុវជនម្នាក់នេះ បានឲ្យដឹងថា យុវវ័យមានសង្សារច្រើនដើម្បីចង់ដឹងថា សប្បាយប៉ុណ្ណា ហើយគេគិតថា គេមានជម្រើសច្រើន។ មិនត្រឹមតែការសប្បាយទេ ដែលជាហេតុនាំឲ្យយុវវ័យធ្វើបែបនេះ លុយនិងសម្ភារៈក៏ជាគ្រឿងទាក់ទាញផងដែរ។ យុវជនម្នាក់នេះ បានបន្ថែមដូច្នេះថា “ខ្ញុំធ្លាប់ឃើញ មានអ្នកខ្លះ មានដៃគូសមរម្យដែរ តែពេលឃើញម្នាក់ទៀតមានឡានជិះទំនើប មានសម្ភារៈល្អៗ គឺចោលអ្នកចាស់ភ្លាមតែម្ដង ដោយសារគេមានជាងសង្ហាជាង”។
សម្រាប់កញ្ញា គន្ធារ និស្សិតឆ្នាំទី០២ នៃសាកលវិទ្យាល័យជាតិគ្រប់គ្រង បានផ្ដល់ អត្ថន័យ ពាក្យថា សង្សារ និងដៃគូស្នេហា ថា សង្សារគឺមនុស្សពីរនាក់ស្រឡាញ់គ្នា ចិត្ត និងចិត្ត គឺមិនមានស្រឡាញ់អ្នកផ្សេងដើម្បីទុកសឺគួរនោះទេ ប៉ុន្តែចំណោះ ដៃគូស្នេហាវិញ គឺស្វែងរកគ្នាដើម្បីតែក្ដីសប្បាយប៉ុណ្ណោះ ដូច្នេះហើយទើបមានការយកដៃគូច្រើន ដែលធ្វើឲ្យប៉ះពាល់ដល់ប្រពៃណី។
ចំពោះសង្គមស៊ីវិលដែលធ្វើការស្និទ្ធជាមួយយុវជន លោក ម៉ាក់ ចំរើន ប្រធានសមាគមយុវជនខ្មែរ បានបង្ហាញចំណាប់អារម្មណ៍ដែរថា ការជ្រើសរើសដៃគូច្រើន ដោយសារតែលំហូរចូលវប្បធម៌ពីបរទេស ហើយពួកគាត់បានយកមកអនុវត្តទាំងស្រុងដោយមិនបានគិតពីផលប៉ះពាល់ វប្បធម៌ខ្មែរ។ កត្តាមួយទៀតគឺ បច្ចេកវិទ្យាខ្ពស់ ពួកគាត់អាចមានឱកាសមើលវីដេអូអាសអាភាស ហើយកើតមានការស្រើបស្រាលជាដើម។ ម្យ៉ាងវិញទៀត ដោយសារការលើកកម្ពស់សិទ្ធិក្នុងការជ្រើសរើស បានធ្វើឲ្យមនុស្សម្នាក់គិតថា ពួកគាត់មានសិទ្ធិអាចជ្រើសរើសបានតាមចិត្តប្រាថ្នា។ ប៉ុន្តែសម្រាប់លោកយល់ថា យុវវ័យមិនគួរមានសង្សារច្រើនក្នុងពេលតែមួយ ព្រោះអាចប៉ះពាល់ដល់ការសិក្សារបស់ពួកខ្លួន ហើយបើល្អកុំទាន់ប្រឡូកឲ្យសោះ។
ចុះមិត្តយុវវ័យវិញ គិតថា គួរមានទុកសឺគួរបែបនេះទេ?
អត្ថបទ៖ កង ចាន់បញ្ញា (Sabay)
_________________________________________
បញ្ជូនព័ត៌មាននេះទៅបណ្តាញទំនាក់ទំនងរបស់អ្នក :
.jpg){kind=tracking}
